သင်္ဂဟကမ်းလက်ရက္ခိတအဖွဲ့ (၁) နှစ်ပြည့် အထိမ်းအမှတ် ဆွမ်းကျွေး ပညာရီးအထော်အပံ့ပစ္စည်း ပီးအပ်လှူဒါန်းပွဲပြုလုပ်----------------------
ရက္ခိုင်ပြည် ရက္ခိုင်လူမျိုး ပညာရီးအထောက်အပံ့အဖြစ် ရည်ရွယ်လို့ ဖွဲ့စည်းထားရေ သင်္ဂဟကမ်းလက်ရက္ခိတအဖွဲ့ စွာ ဒေဂု ၂၀၁၅ ခုနှစ် ဧပြီလ ဆိုပါကေ အဖွဲ့သက်တမ်း (၁) နှစ်ပြည့်ယာ ဖြစ်ပါရေ။ အဖွဲ့ (၁) နှစ်ပြည့် အထိမ်းအမှတ်အဖြစ် ပညာရီးအလှူဒါနတခု လုပ်ဖို့ဆိုပနာ ဆုံးဖြတ်ချက်နန့် အဖွဲ့ဝင်တိ လက်လှမ်းမီသလောက် ရက္ခိုင်ပြည်က မြို့တိမာဟိရေ ပညာရီးလိုအပ်ချက်တိဟိရေ ကျောင်းတိကို စုံစမ်းပနာ စာရင်းရဟိရေ မြို့ (၇)မြို့က ပရဟိတကျောင်း ဘက ကျောင်း (၇) ကျောင်းကို မဲစနစ်နန့် ရွီးချယ်ခစွာမာ မင်းပြားမြို့ တေဇာရာမဘုန်းကြီးကျောင်းမာ ဖွင့်လှစ်ထားဟိရေ "အလင်းစေတမန်" ပရဟိတကျောင်းက ရဟိလားရေအတွက်နန့် ယင်းကျောင်းမာ အလှူလုပ်ဖို့ အတည်ပြုခပါရေ။ သင်္ဂဟကမ်းလက်ရက္ခိတအဖွဲ့ (၁) နှစ်ပြည့် အထိမ်းအမှတ် ဆွမ်းကျွေး ပညာရီးအထော်အပံ့ပစ္စည်း ပီးအပ်လှူဒါန်းပွဲအခမ်းအနားကို (၂၀-၄-၂၀၁၅) ရက်နိကခါ မင်းပြားမြို့ အောက်ရွာပိုင်းရပ်ကွက် စွန်ရဲလမ်းမာ တည်ဟိရေ တေဇာရာမဘုန်းတော်ကြီးကျောင်းမာ ယင်းနိခမိုးထ (၉း၄၅) နာရီအချိန်မာ ပြုလုပ်ခကတ်ပါရေ။
အခမ်းအနားဒို့ တေဇာရာမဆရာတော် အမှုးထားပြီးကေ မင်းပြားမြို့နယ် မြို့နယ်အုပ်ချုပ်ရီးမှူး မြို့နယ်ပညာရီးမှူးနန့် ပညာရီးဌာနက ဖိတ်ကြားထားရေ ပညာရီးဝန်ထမ်းတိ ပြည်နယ်လွှတ်တော်ကိုယ်စားလှယ် မြို့နယ်စည်ပင်သာယာရီးကော်မတီဥက္ကဋ္ဌနန့် အဖွဲ့ဝင်တိ မြို့နယ်ဖွံ့ဖြိုးတိုးတက်ရီး အထောက်အကူပြုကော်မတီ ဥက္ကဋ္ဌ ရခိုင်အမျိုးသားပါတီနန့် အမျိုးသားဒီမိုကရေစီ အဖွဲ့ချုပ်က တာဝန်ဟိရေလူတိ မြို့မိမြို့ဖတိနန့် ဖိတ်ကြားထားရေ အာဂန္တုတိ အလင်းစေတမန် ပရဟိတကျောင်းက ဆရာ/မတိ သင်္ဂဟကမ်းလက်ရက္ခိတအဖွဲ့ဝင် မိဘတိနန့် အဖွဲ့သူ/သားတိ စုစုပေါင်း (၇၀) ကျော် တက်ရောက်ခကတ်ပါရေ။:
ယင်းနိ အခမ်းအနားမာ အခမ်းအနားမှူးအဖြစ် သင်္ဂဟကမ်းလက်ရက္ခိတအဖွဲ့က နွယ်နွယ်စံ (မင်းပြား) နန့် မေမေသူ (ကျောက်တော်) ရို့က အခမ်းအနားမှူးအဖြစ် ဆောင်ရွက်ခပြီးကေ မိုးထ (၉း၄၅) နာရီအချိန်မာ အခမ်းအနားကို နမောတသ (၃) ကြိမ်ရွတ်ဆိုပနာ စတင်ဖွင့်လှစ်ခပါရေ။
ယင်းနောက် တေဇာရာမဆရာတော်ဘုရားဖြစ်တေ ဘဒ္ဒန္တ ဥာဏသာမိ (မိုးပြို-မင်းပြား) အသျှင်သူမြတ်ဘားက (၅) ပါးသီလ ခံယူကတ်ပနာ ဆရာတော်က သြဝါဒစကား ချီးမြှင့်ခပါရေ။
အစီအစိုင်အရ သင်္ဂဟကမ်းလက်ရက္ခိတအဖွဲ့က ဘဏ္ဍာရီးမှူးတယောက်ဖြစ်တေ ကိုခိုင်ဇော်လင်း (မင်းပြား) က အဖွဲ့စတင်ဖြစ်ပေါ်လာပုံနန့် အဖွဲ့လုပ်ဆောင်ရေ ဖွဲ့စည်းပုံတိကို ရှင်းလင်းတင်ပြခပါရေ။ ယင်းနောက် အဖွဲ့ ပြန်ကြားရီးမှူး မနှင်းကဗျာနွယ် (မင်းပြား) က (၁) နှစ်အတွင်း သင်္ဂဟကမ်းလက်ရက္ခိတအဖွဲ့က ဆောင်ရွက်နိုင်ခရေ ပညာရီးအထောက်အပံ့ လုပ်ဆောင်ချက်တိကို တခုချင်းစီ ရှင်းလင်းတင်ပြပီးခပါရေ။ ယင်းနောက် အဖွဲ့ တွဲဖက်အတွင်းရီးမှူး ကိုဇော်အောင်ထွန်း (မြောက်ဦး) က (၁) နှစ်ပြည့် အထိမ်းအမှတ် လုပ်ဆောင်ချက်နန့် အဖွဲ့က ဆောင်ရွက်လားဖို့ ချမှတ်ထားရေ ရှိလုပ်ငန်းစိုင်တိကို ရှင်းလင်းတင်ပြပီးခပါရေ။
ယင်းနောက် ပညာရီးအလှူပစ္စည်းတိ ပီးအပ်တေအစီအစိုင်မာ ဗီဒို (၁) လုံး ထီး (၁၀၀) လွယ်အိတ် (၁၀၀) ဗလာစာအုပ် (၂၀) ဒါဇင် ဘောပန် ခဲတံ ပေတံ (၁၀၀) စီ နန့် အလှူဖေသာ ကျပ် - ၁၅၀၀၀၀ိ/- (ကျပ်တသိန်းငါးသောင်း) ကို တေဇာရာမဆရာတော်ဘားကို ပီးအပ် လှူဒါန်းခကတ်ပါရေ။
ယင်းနောက် "အလင်းစေတမန်" ပရဟိတကျောင်းက ဆရာမ တယောက်က အလှူအတွက် ကျေးဇူးတင်စကား ပြန်လို့ ပြောကြားပြီးကေ လှူဒါန်းခရေ အလှူအားလုံးအတွက် ရီစက်သွန်ချ အမျှပီးဝီပနာ ဗုဒ္ဓသာသနံ စိရံတိဌတု (၃) ကြိမ် ရွတ်ဆိုပနာ အခမ်းအနားကို မိုးထ (၁၀း၄၅) နာရီ အချိန်မာ အောင်မြင်စွာ ရုပ်သိမ်းနိုင်ခပါရေ။
ယင်းနောက် အခမ်းအနားဒို့ တက်ရောက်လာကတ်တေ လူတိ အားလုံးကို မွန်းတည့်ဆွမ်း ကျွေးမွေးလှူဒါန်းခပါရေ။
ဒေဂုပိုင် သင်္ဂဟကမ်းလက်ရက္ခိတအဖွဲ့က ရက္ခိုင်ပြည် ရက္ခိုင်လူမျိုးရို့ ပညာရီးကို ထောက်ပံ့ပီးနိုင်ခစွာရေ အဖွဲ့ဝင်တိကြိုးစားမှုနန့် အလှူသျှင်တိ အင်အားကြောင့်ဖြစ်တေအတွက်နန့် အလှူသျှင်တိနန့် သင်္ဂဟကမ်းလက်ရက္ခိတအဖွဲ့ဝင်တိ အားလုံးကို ကျေးဇူးတင်ဟိပါကြောင်း မှတ်တမ်းတင်အပ်ပါရေ။
ဦးကျော်ဌေး (အတွင်းရေမူး)
သင်္ဂဟကမ်းလက်ရက္ခိတအဖွဲ့
နိရက် ။ ၂၀၁၅ ခုနှစ် ဧပြီလ (၂၃) ရက်
No comments:
Post a Comment